المديرين كمان بيغلطوا … الجزء الأول

كتب بواسطة : Asmaa Hussein
في :

ايوه بالظبط ..المديرين كمان بيغلطوا زيهم زي أي موظف تاني، وده لأن الخطأ وارد من أي انسان. عشان كده، فيه نوعين من المدُراء، النوع الأول وده بيكون دماغه حلوة وبيفكر فى مصلحة الشغل وإزاي يطور من الشغل وبيساعد التيم بتاعه. أما النوع التاني، فده بقى بيبقى فاكر نفسه عارف كل حاجة ومابيغلطش، وده بيكون “الأنا” عنده عالي أوي لأنه مابيقدرش يتخيل أن ممكن حد يعدل عليه. النوع ده صعب أوي في التعامل معاه وبيكون عبء على الشركة والموظفين. خلونا نعرف الأخطاء اللي بيقع فيها النوع ده:

  1. مفيش خطة واضحة للتيم: كتير من المديرين بيهمل موضوع الـ plan ده واللي فالآخر بيأثر على الشغل. عشان كده مهم إن يكون فيه objective واضحة للشغل والمهام تتوزع بشكل صح وفريق العمل كله يقعد ويتناقش في ايه اللي المفروض يتعمل وهيتعمل ازاي ومين هيكون مسؤل عن ايه،
  2. مفيش تشجيع ودايماً بيقلل من شغل التيم: من الغلطات اللي كتير من المديرين بيقعوا فيها وبتأثر بطريقة عكسية على التيم والشغل، هى إن مفيش تشجيع من المدير وعمره ما بيعترف إن التيم بتاعه شغله حلو ودايماً بيديهم في طاقة سلبية. ده بيسبب إن لو حتى التيم بيشتغل حلو، هيجي عليه وقت ويجيلوا احباط عشان مفيش تقدير سواء معنوي أو مادي من المدير،
  3. مش بيشارك القرارات مع التيم بتاعه: كتير من المديرين بيفتكروا إن القرار في إيدهم هما بس من غير ما يسمعوا للموظفين ويشاركوهم خطة الشغل. عشان كده، مهم إنك تشارك موظفينك القرارات عشان يحسوا إنهم بيشتغلوا في تيم وفي الشركة بتاعتهم مش بس مجرد موظفين وخلاص. كمان مهم إنك تعمل إجتماع مع التيم بتاعك بإستمرار عشان تبقي updated دايمأ بتطورات الشغل،
  4. مفيش اهتمام بتطوير التيم: من أكبر الغلطات اللي بيقع فيها مديرين كتير هى إنهم مش بيهتموا بتطوير التيم بتاعهم وده بينعكس على الشغل فالأخر. يعني مهم إن المدير يخلي باله من التيم بتاعه ويطور من مستواه سواء في الحاجات اللي ليها علاقة بالشغل أو بمهارات التواصل مع الآخرين.

تابعونا عشان تعرفوا أكتر عن أخطاء المديرين – الجزء التاني!