المديرين كمان بيغلطوا – الجزء الثاني

كتب بواسطة : Asmaa Hussein
في :

ومكملين معاكوا الأخطاء اللي بيقع فيها المُديرين عشان نحاول نطور أكتر من الشغل ونعرف إذا كانت بيئة العمل دي مُناسبة لينا ولا لأ وإزاي كمان نطور منها. فالأخطاء دي زي:

  1. التمييز بين الموظفين: ساعات كتير من المُديرين بيكون عندهم الموظف اللي بيحبوه وبيفضلوه على باقي الموظفين واللي بالتالي بيخلي باقي الموظفين يكرهوا الموظف ده ويحصل غيرة ما بينهم. فطريقة المعاملة دي بتأثر على الشغل بالسلب،
  2. مش بيناقش الموظفين في المشاكل: أكيد كل شغل ليه مشاكله، بس مش كل شغل فيه مُدير مش بيهتم بالموظفين وإنه يحل المشاكل ويساعد الشركة، عشان كده من الأخطاء اللي بتأثر على الشغل بشكل سلبي هي إن المُدير ما بيسمعش مشاكل الموظفين واللي بتنعكس على الموظفين وبتنشر الروح السلبية في المكان وممكن جداً الناس تبدء تكره الشغل وتسيبه لأن مفيش حاجة بتتحل،
  3. مفيش تقييم: أي حد بيشتغل بيكون عايز يعرف إذا كان شغله كويس ولا لأ عشان يقدر يطوّر من نفسه ومن شغله، عشان كده مهم إن المدير يقول للموظفين رأيه والتقييم بتاعهم ويوجههم، لأن الموظف أول ما بيحس إنه مش بيطوّر ومفيش جديد، بيبدء يكره الشغل ويفكر يسيبه،
  4. مصدر إحباط للتيم: فيه كتير من المُديرين بيكونوا فاهمين الموضوع غلط وبيفتكروا إنهم لما يقولوا للموظف كل الأخطاء والسلبيات في شغله بيكونوا بكده مصدر قوة وإن الموظف يطوّر من شغله. أكيد طبعأ مهم إن الموظف يعرف السلبيات عشان يشتغل على نفسه، بس الأهم بردو إن يسمع الحلو فيه وفي شغله عشان يبقى فيه توزان ومايحسش إن تعبه وشغله مالهوش لازمة وإن المُدير بيتصيد الأخطاء بس.

شاركوا معانا المُدير بتاعكوا بيتعامل معاكوا إزاي في الشغل وإزاي بتتناقشوا وإزاي ده بيأثر على الشغل والإنتاجية.