أسباب تخليك تفكر إن وظيفتك الحالية مش مُناسبة ليك

كتب بواسطة : Asmaa Hussein
في :

مع مرور الوقت وإن الواحد مشغول في ضغط الشغل وإن إزاي يثبت نفسه فيه، بنلاقي نفسنا نسينا أهم حاجة وهى يا ترى الشغل اللي بنشتغله ده هو المُناسب لينا ولا ضغوط الحياة والشغل، خليتنا ننسى هدفنا وإننا نشتغل شغل بنحبه وعايزين نكمل فيه باقي حياتنا، عشان كده انهاردة قررنا إننا نقولكوا على بعض المؤشرات اللي لو بتحصل معاك في شغلك، يبقى جه الوقت إنك تقف وتفكر إنك تسيب الشغل وتدور على الحاجة اللي بتحبها.

  1. محدش بيقدر شغلك: لما توصل لمرحلة في شغلك إنك بتشتغل جامد وعامل اللي عليك وأكتر وفي الآخر محدش بيقدر تعبك ومجهودك؛ سواء تقدير مادي أو معنوي، يبقى أكيد لازم تسيب الشغل ده وتشوف حاجة أحسن،
  2. لما تلاقي نفسك مش مبسوط ودايماً قلقان ومُجهد: في الحالة دي، تعرف إنك مش في المكان الصح ومحتاج إنك تغيره وده لإنك لو في الشغل اللي بتحبه، المفروض تبقى مبسوط ودايماً عندك الحماس إنك تطور من نفسك ومن الشغل،
  3. لو لاقيت إن كل اللي بيهمك هو الفلوس وبس: أكيد طبعاً الفلوس مهمة، لكن لما تلاقي إن الفلوس بس هى محور إهتمامك في الشغل ومش مُهتم بالشغل نفسه وتطويره، يبقى أكيد إنت في المكان الغلط ومش ده الشغل المُناسب ليك،
  4. لو المدير بتاعك حد مُتسلط ومش بيهتم إنه يتناقش معاك في الشغل ودايماً شايف إنه هو الصح وبالتالي مفيش مكان للتطوير.

لو لاقيت المؤشرات أو الحاجات اللي إتكلمنا فيها دي بتحصل معاك في شغلك، يبقى أكيد لازم تعيد تفكير في الشغل اللي إنت فيه وتدور على حاجة تانية أنسب ليك.